• БАЛЕТ ВО ВРЕМЕ НА КОВИД - 19

    На 11 март тимот на Bullfrogs Ballet School донесе тешка, но сепак соодветна одлука, во време на пандемијата предизвикана од вирусот Ковид–19: просториите на училиштето ќе бидат затворени се додека надлежните институции и Владата не одлучат дека е безбедно физичко присуство на повеќе луѓе во иста просторија. Бидејќи здравјето на нашите ученици и професори е приоритет, оваа одлука беше едногласна. Поаѓајќи од неопходноста за континуитет во балетското образование, донесовме едногласна одлука училишната балетска настава да продолжиме да ја реализираме онлајн.

    По консултација и позитивен одговор од родителите/старателите на нашите ученици дека се согласуваат со виртуелна балетска настава, започнавме со работа. Во овој период кој е вознемирувачки за сите нас, внесовме светлина и позитивна енергија и научивме да се прилагодуваме на различни ситуации.

    И понатаму нашиот тим ќе продолжи да внесува светлина во овој период. Најголемиот поттик и мотивација за сите нас е фактот дека учениците го сакаат балетот и успешно се прилагодуваат во дадената ситуација. Затоа, ние и понатаму ќе ги подржуваме нашите ученици и ќе се радуваме на сите успеси кои ги постигнуваат.

    Балетските програми на Bullfrogs Ballet School се целосно образложени на нашата веб страница, а ние остануваме отворени за нови членови во нашето балетско семејство. Доколку Вашето дете има желба да танцува и да следи балетска настава, можете да аплицирате ТУКА.

    Балетските часови се одржуваат редовно на платформата  ZOOM, која веќе два месеци се докажа како одлична алатка која ни овозможува успешно одржување на балетската настава.

    Како и во нормалните услови така и во оваа вонредна состојба, наставата на училиштето се одржува во попладневните часови, задржувајќи ги термините од регуларната настава. Навистина е прекрасно што во домашен амбиент пред камерите ги гледаме нашите ученици облечени во балетска опрема, секогаш насмеани. Правилата кои се наша одлика се применуваат и при виртуелната настава. Особена мотивација е фактот дека нашите ученици се свесни и ги почитуваат бон-тон правилата на балетскиот час. Среќни сме што посветената работа на нашите ученици и педагози во текот на годината резултира со неизмерна дисциплина која во овој период е видно воочлива. Среќни сме што нашето Bullfrogs Ballet семејство вбројува неуморни, посветени и амбициозни деца и млади кои не отстапуваат од патот до успехот.

  • Порака од Александра Никифоровски

    Уметнички Директор

    Светот брзо се менува, а очекувањата од училиштата се повеќе се зголемуваат. Знаењето и вештините го движат светот напред, но во овие моменти се докажува дека без технолошкиот напредок сето ова би било многу отежнато. Во ова време на глобална криза, предизвикана од пандемијата со вирусот КОВИД-19, единствено на што размислуваме сите е подобро утре, кое за жал се уште е неизвесно. Кога велам утре, мислам на нашата иднина за која треба рационално да размислуваме. Моите искрени напори се да ја насочувам работата на училиштето кон постојано подобрување на наставната програма, со примена на иновативни пристапи кон учењето. Се стремам кон девизата дека учењето е радост со цел. ББС отсекогаш се одликувало со компетентност, доверба во учениците и во училишниот тим, постапување со интегритет и ведар дух, подготвеност да се преземе одговорност. Нашиот пристап оди чекор подалеку од балетот, со континуирана поддршка за добросостојбата на нашите ученици и грижа за нив. Овие наши карактеристики и однос према учениците и во оваа ситуација остануваат непроменети, затоа едногласно одлучивме дека позитивниот дух од просториите на нашето училиште ќе го пренесеме виртуелно со помош на електронските уреди и интернетот, без кој денес не би опстанале. Бидејќи добрите учители никогаш не застануваат, целиот тим на ББС нема да дозволи оваа пандемија да ја спречи едукацијата и образованието на младите таленти.

    Сите ние сме одговорни пред своите деца и затоа сметам дека во овој период е неопходно да се вложи труд од повеќе страни. Сите треба да имаме заедничка цел за нашите деца, а тоа е да не се уништат нивните досегашни навики и учење. Редовното присуство има голема улога во подобрување на резултатите. Не смееме да им ги нарушиме навиките на децата кои долго време ги граделе, особено за балетот кој бара континуираност. Важна одлика на онлајн наставата е дека степенот на развој и напредокот на нашите ученици воопшто не е намален, напротив, забележуваме раст и развој кај учениците. Оваа за сите нас тешка ситуација, а особено за децата, претставува голем предизвик исполнет со безброј пречки, но затоа тука се родителите и педагозите. Со заеднички напор можеме да им покажеме на децата дека е многу важно разумно, одговорно и издржливо да ја пребродиме оваа препрека. Отстапувањето од нашите навики и од континуитетот во образованието, вклучувајќи го и балетското, резултира со отежнат пат кон успехот, пред се земајќи го како цел градењето на добар карактер кај децата. Децата со добар карактер живеат подобро. Затоа нашето училиште останува да биде отворено за соработка онаму каде треба помош, задржувајќи ја својата општествена и морална одговорност.

    Ги повикувам сите родители чии деца не можат да го продолжат своето балетското образование да ни се придружат во онлајн наставата.

    Искрено се надевам дека целата оваа неизвесност набргу ќе заврши и ќе се вратиме во нашите балетски сали, исполнети со елан и добро расположение. Посакувам за сите позитивни мисли кои ќе не водат кон поспокојно справување со оваа непријатна епизода од нашето секојдневие.

    Останете дома и танцувајте со нас ♥,